Яагаад?

 Одод яагаад гэрэлтдэг юм бол
Орчлон яагаад эргэдэг юм бол
Тэнгэр яагаад дээр дүнхийж
Тээр доор газар угтдаг юм бол
Учиг юуг ухан бодвол
Уул мэт хариу өгөх байх л даа
Учиглаж түүнийг асуух
Ухаан хаанаас гардаг юм бол
Эргэн тойрон байгаа бүхнээ
Эхлэл болгон харна гэдэг
Эрдэм оюунд шимтэнэ гэдэг
Энэ бүхэн хаанаас ундардаг юм бол
Таавар болгон хайгаад үзвэл
Танил дотно санагдах болов уу
Таны бидний заяа тавиланг
Тайлан дэлгэн хүүрнэх болов уу
Жим мөрөөр нь хөөгөөд үзвэл
Жижиг гэлгүй анзаараад үзвэл
Гүн далайн ёроолд хүрэх мэт
Гэрэлт тивийн захад хүрэх мэт
Амь амьдралын сүмэр уулнаас
Атган авах эрдэнэс мэт
Алдууралгүй барих ухаан цогцолвоос
Алаг дэлхийн үр нь болно